8 oktyabr “Gazelli Art House Baku”da dünya şöhrətli rəssamların beynəlxalq sərgisi açıldı. "Gazelli Art House Baku" qalereyası 9 oktyabr – 20 dekabr tarixlərində tanınmış kuratorlar Dr. Alfredo Kramerotti və Auronda Skaleranın kuratorluğu ilə "Hər şey qatlanır, açılır, yenidən qatlanır" adlı qrup sərgisini təqdim edir. Venesiya Biennalesi, "Noor Riyadh" və "Art Dubai Digital" kimi beynəlxalq platformalar üçün layihələr hazırlamış kuratorlar Bakıda Mərkəzi Asiya, Körfəz regionu və Azərbaycandan altı qadın rəssamı bir araya gətirirlər.
Sərginin açılışını "Gazelli Art House" Bakı qalereyasının meneceri Bahar Zeynallı etdi. Tədbirdə kuratorlar, rəssam Elnarə Nəsirli və İtaliyanın Azərbaycandakı səfiri Luka Di Canfrançesko çıxış etdilər. Səfir çıxışında İtaliya ilə Azərbaycan arasındakı mədəni əlaqələrin əhəmiyyətini vurğuladı, əslən italiyalı olan və açılış üçün Dohadan Bakıya gələn kuratorları, rəssamları və qalereyanı sərginin açılışı münasibətilə təbrik etdi. Qonaqlar arasında Argentina səfiri Marianxeles Belluşi, Hindistan səfiri Abhay Kumar, İordaniya səfiri Ömər Bərəkət əl-Nahar, Latviya səfiri Edqars Skuya və Litva səfiri Kestutis Vaşkeleviçus, eləcə də Böyük Britaniya, Səudiyyə Ərəbistanı, Türkiyə, Rusiya, Qazaxıstan, Pakistan, İran, İraq, Liviya, Meksika və Belarus səfirliklərinin nümayəndələri var idi.
Sərgi 2026-cı il Bakı Beynəlxalq İncəsənət Festivalı (BIAF) və "Bakıya uçuş. İncəsənət həftəsonu. Gələcəyi İNDİ duy" proqramına daxildir. O, Bakının payız mədəniyyət mövsümü boyunca ziyarətçilər üçün açıq olacaq. Sərgidə Körfəz regionunun aparıcı müasir rəssamlarından Sofiya Al-Mariya və Manal AlDovayan, eləcə də beynəlxalq incəsənət səhnəsində tanınan Aziza Kadıri, Raya Kassisiye, Almagül Menlibayeva və Elnarə Nəsirli iştirak edir. Onların bir neçəsi son illərdə Venesiya Biennalesində öz ölkələrini təmsil edib və ya biennalenin rəsmi proqramlarında iştirak edib. Sərgi mədəni irsin zamanla necə dəyişərək yaşadığını araşdırır. Adını fransız filosofu Jil Delözün "qatlanma" konsepsiyasından götürür: keçmiş yoxa çıxmır, hər dəfə yeni formada qarşımıza çıxır. Ekspozisiyada instalyasiya, heykəltaraşlıq, tekstil, hərəkətli təsvir, fotoqrafiya, rəngkarlıq və keramika yer alır.
Sərgidə Bakı üçün xüsusi yaradılmış yeni əsərlər də nümayiş olunur. Qətər-ABŞ mənşəli rəssam Sofiya Al-Mariya sərgi üçün "Biz ona lazım olanı verə bilmədik" və "O, aqressivləşmişdi" (2026) adlı iki yeni rəsm əsəri hazırlayıb. Bakıda doğulmuş azərbaycanlı rəssam Elnarə Nəsirli isə "Qabığın kabusu" (2026) əsərini təqdim edir. Rəssam bu il 61-ci Venesiya Biennalesinin rəsmi paralel tədbirində iştirak edib.
Özbəkistan əsilli Alman rəssam Aziza Kadıri "Süni intellektlə söhbətlər (III)" (2026) əsərində ənənəvi süzəni naxışlarını generativ süni intellektlə dialoqa gətirir. Səudiyyə Ərəbistanını 60-cı Venesiya Biennalesində təmsil etmiş Manal AlDovayanın "Yıxılmamışdan əvvəl bax" (2023) əsəri bədəvi qadınlarının yaşatdığı sadu toxuculuq ənənəsindən qaynaqlanır.
Qazaxıstanlı Almagül Menlibayeva "Ana Su. Gülbibi Balxaş" (2024) əsərində mif və Balxaş gölünün ekoloji vəziyyəti mövzularını birləşdirir. İordaniyalı Raya Kassisiye "Tikanlı taxt" (2025) əsərində keçi və qoyun yununu geyim, bitki və zireh arasında dayanan heykəl formasında təqdim edir.
Dr. Alfredo Kramerotti Qətərdə "Northwestern" Universitetinin "Media Majlis" muzeyinin direktoru və Müasir İncəsənət Kuratorlarının Beynəlxalq Assosiasiyasının (IKT) prezidentidir. Venesiya Biennalesi, "Manifesta", "Noor Riyadh" və "Art Dubai Digital" üçün layihələr hazırlayıb, Britaniya Şurasında məsləhətçi kimi fəaliyyət göstərib.
Auronda Skalera müasir incəsənət, rəqəmsal mədəniyyət və süni intellekt sahələrində çalışan art direktor, kurator və mədəniyyət strategiyaları üzrə mütəxəssisdir. Layihələri arasında Venesiya Biennalesi, "Art Dubai Digital", "Noor Riyadh" və Sotheby's üçün "Lumen Prize" yer alır. 2023-cü ildə "NYC Journal" tərəfindən mədəniyyət sahəsində ən ilhamverici 20 qadından biri seçilib.
Sərgi 9 oktyabrdan 20 dekabradək ziyarətçilər üçün açıqdır. 10 oktyabrda saat 17:00-da qalereyada kuratorlar Dr. Alfredo Kramerotti və Auronda Skalera ilə sərgi turu (ingilis dilində), saat 18:00-da isə kurator söhbəti və sual-cavab sessiyası (ingilis və Azərbaycan dillərində) keçiriləcək. Söhbətin moderatoru kurator və "Atesh Hub"un təsisçisi Səbinə Şıxlinskayadır.
Ünvan: Gazelli Art House, Bakı, Lev Tolstoy küçəsi 172.
Sərgiyə giriş pulsuzdur.
"Gazelli Art House" 2010-cu ildə Mila Əsgərova tərəfindən təsis edilib və London, Nyu-York və Bakıda fəaliyyət göstərir. Qalereya Azərbaycan və Qafqaz regionundan olan rəssamlara uzunmüddətli dəstək göstərir və regionun mədəni irsinin beynəlxalq miqyasda tanınmasına töhfə verir.
