6 oktyabr Avropa İttifaqının Azərbaycandakı Nümayəndəliyi Aİ-na Üzv Dövlətlərin Səfirlikləri ilə birgə Avropa Oyunlar Parkında ikinci “Avropa Təamları” Kulinariya Festivalını təşkil etdi. Tədbirin məqsədi Avropa mətbəxini Azərbaycan ictimaiyyətinə nümayiş etdirməkdir. Tədbirdə Belçika, Çexiya, Fransa, Almaniya, Yunanıstan, İtaliya, Litva, Polşa, Portuqaliya, Rumıniya, Slovakiya, İspaniya və İsveçin səfirlikləri qonaqları öz ölkələrinin mətbəxi ilə tanış etdi. Aİ Nümayəndəliyi tərəfindən dayanıqlı qida istehlakını təşviq edən stend təqdim edildi. Gənc aşpaz Yaqub Zeynalzadə yerli mövsümi məhsullardan istifadə etməklə bitki mənşəli yeməklərin hazırlanması üzrə ustad dərsi keçirtdi. O, həmçinin bio və eko-məhsulların ətraf mühit və sağlamlıq üçün faydalarından danışdı. "Biz Avropa kulinariya ənənələrini azərbaycanlı dostlarımıza nümayiş etdirməkdən məmnunuq. Hər kəsi bizə qoşulmağa və Avropa ölkələrinin unudulmaz kulinariya təamlarından, canlı musiqi proqramından və daha çox şeylərdən həzz almağa dəvət edirik” - deyə Aİ-nin Azərbaycandakı səfiri Peter Mixalko bildirdi.
Tədbir zamanı viktorinaların qalibləri digər mükafatlarla yanaşı, Aİ Nümayəndəliyi tərəfindən nəşr edilmiş və Aİ-nin 27 üzv ölkəsindən Azərbaycan dilinə tərcümə edilmiş ənənəvi reseptlər toplusundan ibarət “Avropanın təamları” kitabını da əldə etdi. Bu kitabı həmçinin Avropa İttifaqının Azərbaycandakı Nümayəndəliyi veb səhifəsindən elektron formada əldə etmək mümkündür. Festival Azərbaycan və Avropa dillərində çıxış edən yerli musiqiçilərin konserti ilə müşayiət olundu.
Tədbirdə həmçinin tədbirdən əvvəl “Azeri Home Chef” Facebook səhifəsi tərəfindən təşkil olunan Avropa yeməklərinin kulinariya müsabiqəsinin və rəsm müsabiqəsinin mükafatlandırma mərasimləri keçirildi. Festivalda müsabiqə iştirakçılarının hazırladıqları yeməklər də təqdim olundu və qaliblər müəyyən edildi. Birinci yer - Yuliya Əskərova, 2 - Nurana Şıxaliyeva, 3 - Şəhla Cəbrayılova, 4 - Yegana Kaşkay, 5 - Tərəvət Məmmədova.
Qaliblərə AI və sponsorlar tərəfindən dəyərli hədiyyələr təqdim olundu, birinci yerin sahibəsi isə Avropa ölkəsinə səyahət qazandı.
