14 dekabr Azərbaycan Milli İncəsənət Muzeyində Əməkdar rəssam, professor Tahir Məmmədovun yaradıcılığına həsr olunmuş kitabın təqdimat mərasimi keçirilib. Qonaqları salamlayan Azərbaycan Milli İncəsənət Muzeyinin direktoru, sənətşünaslıq üzrə fəlsəfə doktoru Şirin Məlikova Tahir Məmmədovun yaradıcılığı və əsərlərinə xas olan əsas bədii məziyyətlərdən bəhs edib.
Millət vəkili, Azərbaycan Respublikası Milli Məclisinin Mədəniyyət komitəsinin sədri Polad Bülbüloğlu, Xalq yazıçısı Çingiz Abdullayev, Xalq rəssamı, professor Səlhab Məmmədov, Əməkdar incəsənət xadimi, sənətşünaslıq üzrə fəlsəfə doktoru Ziyadxan Əliyev, Bakı İncəsənət Mərkəzinin rəhbəri Rafael Gülməmmədli, yazıçı-publisist, Bakı Kitab Mərkəzinin rəhbəri Günel Anarqızı öz çıxışlarında Tahir Məmmədovun yaradıcılıq fəaliyyətinin özünəməxsusluğundan söz açaraq təqdim olunan kitabın onun sənət yolunu dolğun şəkildə işıqlandırdığını söyləyiblər, həmçinin istedadlı rəssama gələcək fəaliyyətində yeni-yeni uğurlar arzulayıblar.
Daha sonra Tahir Məmmədovun oğlu, tanınmış pianoçu, bəstəkar Riad Məmmədovun ifasında maraqlı improvizasiyaları ilə yadda qalan musiqi nömrələri səsləndirilib. Qeyd edək ki təqdimat mərasimi keçirilən kitabda rəssamın sənət yolunun geniş təhlili ilə yanaşı, onun bütün yaradıcılığı boyu ərsəyə gətirdiyi əsərlərin əksəriyyətinin reproduksiyaları yer alıb. Tahir Məmmədovun rəngkarlıq lövhələri Azərbaycan muzeyləri ilə yanaşı, xarici ölkələrin sənət saxlanclarını və nüfuzlu kolleksiyalarını bəzəməkdədir. Tədbir zamanı qonaqlar Tahir Məmmədovun əsərlərindən ibarət sərgi ilə də tanış olublar.
